الإستشارة 16/08/2026
0
كنت عم اتفرج عالتيك توك عادي جداً وفجأة بلشت تطلعلي فيديوهات عن جهاز العروس المصرية قلت خليني شوف شو القصة عادي بس بصراحة انصدمت من الكميات! يعني من كل غرض في عشرات القطع وكل قطعة إلها شكل واستخدام كاسات للضيوف وكاسات للبيت وكاسات للطعام وكاسات لأشياء ما بعرف شو هي أصلاً وبعدين أغطية ومفارش وفرش وكأن البيت عم يتجهز لعيلة كاملة مو لعروسين.
والأغرب من هيك إن في أشياء بتنشرى من هلق على أساس إنو ممكن يجي أطفال بعد سنة أو سنتين أو حتى بعد كم سنة يعني كأنها عم تجهز البيت لخمس سنين لقدام!
طيب لحظة هون أنا جد استغربت ليش كل هالكمية؟ إذا العروس بدها تفرش بيتها حسب عادات بلدها ما عندي مشكلة العادات بتختلف من مجتمع لمجتمع بس إمتى العادة بتتحول لإسراف؟ وهل فعلاً كل هالأغراض رح تضيف قيمة للمرأة وحياتها الزوجية؟ ولا بعد فترة رح يصير البيت مليان أغراض وزحمة وأشياء ما حدا عم يستخدمها؟ والأهم من كل هاد إذا احتجنا غرض بعد سنتين أو تلاتة ليش ما نشتريه وقت الحاجة؟ ليش من هلق نشتري أغراض لأطفال لسا ما إجوا؟
أنا هون ما عم أسأل عن العادات المصرية بس أنا عم أسأل عن الحكم الشرعي هل هالطريقة بالتجهيز فيها إسراف وتكلف؟ وشو المفروض يكون دور العلماء والدعاة بتوعية الناس إذا كانت بعض هالعادات عم تحوّل الزواج لبداية من الديون والمبالغة بدل البساطة والاعتدال؟
وهل برأيكم جهاز العروس بهالشكل فعلاً إيجابي للمرأة والأسرة على المدى البعيد؟ ولا صار عبء اجتماعي ومادي أكتر من كونه حاجة حقيقية؟
لم تتم الاجابة بعد
