هل تقبل بإقامة حماتها معها؟

بنتي متجوزة بقالها كام سنة وعندها ولد وبنت وحياتها مستقرة الحمد لله، من فترة والد جوزها توفي وربنا يرحمه وحماتها بقت لوحدها لأن بناتها مسافرين وهو ابنها الوحيد وكانوا كل يوم أو اتنين بياخد بنتي وولاده وبيرحوا يزورها ويقضوا معاه اليوم وبنتي بتخدمها لو في غسيل تغسله وتعمل الاكل وتشيله في التلاجه وكده.

بس فجأة جوز بنتي قال إنه مش هيقدر يسيب أمه تعيش لوحدها تاني بعد وفاة والده وان مينفعش كل يومين يروحوا لها وقرر يجيبها تقيم معاهم في الشقة بشكل دائم، وقال إن ده واجبه ومش هيتراجع عنه.

بنتي معندهاش مشكلة تزورها أو تخدمها أو حتى تقعد معاهم فترة لحد ما حالتها النفسية تتحسن لكن فكرة إنها تعيش معاهم على طول هي مش قادرة تتقبلها، لأنها حاسة إن حياتها وخصوصيتها هتتغير تماما.

دلوقتي البيت كله مشحون، وكل واحد متمسك برأيه. جوزها شايف إنه بيبر أمه وبنتي شايفة إن من حقها يبقى لها بيتها واستقلالها ومحدش يشاركها فيه.

أنا كأم محتارة، ومش عارفة أنصح بنتي بإيه. هل المفروض تتنازل وتوافق ولا من حقها ترفض الإقامة الدائمة ولو كنتم مكانها كنتوا هتتصرفوا إزاي لأننا فعلا محتارين ومش عارفين.