تُكرم خادمتها ماليًّا لكنها تهينها.. كيف تتقي الله فيها؟

السلام عليكم ورحمة الله وبركاته.أنا سيدة حالتي المادية وايد ممتازة وميسورة والحمد لله رب العالمين. عندي بالبيت عاملة منزلية (خدامة) من جنسية غير عربية لكنها مسلمة. الصراحة أنا أحاول كثر ما أقدر إني أحسن إليها؛ يعني معاشها تاخذه أول بأول وبوقته، وأوفر لها كل احتياجاتها من أكل وشرب ولبس، وما أبخل عليها بشيء من هالناحية.لكن المشكلة إنها ساعات تغلط بالشغل، أو تنسى بعض الأمور، وأنا أحيانًا ما أتمالك نفسي وأتنرفز بسرعة. فأصرخ عليها وأرفع صوتي، وساعات للأسف أحرجها وأفشلها جدام عيالي أو جدام الضيوف اللي يزوروني بالبيت.أنا بيني وبين نفسي أقول: "أنا مو ظالمتها، معطيتها حقها المالي كامل وزيادة"، بس الحق ينقال إن مشاعرها ونفسيتها ما تهمني وايد وقت الخطأ، ولا أحط لها اعتبار لما أعصب. الحين قام يأنبني ضميري وخايفة، وودي أسألكم: هل تصرفي هذا وصراخي عليها وتفشيلها جدام الناس يخالف الأدب الإسلامي والشرع في التعامل مع الخدم؟وهل يكفي إني أأدي لها أجرها كامل عشان تبري ذمتي جدام رب العالمين؟ ولا الأخلاق وجبر الخواطر لها نصيب بالحساب والعقاب عند الله؟وشلون أقدر أتقي الله فيها وأمسك أعصابي؟ وشنو تنصحوني عشان أكفر عن اللحظات اللي ضايقتها فيها؟وجزاكم الله خير الجزاء، وبميزان حسناتكم يارب.