الإستشارة 30/09/2026
0
بنتي كانت مخطوبة ومكتوب كتابها وخطيبها كان بيحبها وهي كانت بتحبه وكانوا مع بعض في الجامعة بعد ما خلص جامعته جه واتقدم لها وخطبها وكتب كتابه عشان كان عايز يسافر سافر خمس سنين وطول الخمس سنين كان بيتواصل معاها وبيجيب لها هدايا وجاب لها شبكتها وكان من وقت للتاني يفرحها بحاجة.
وبعد خمس سنين نزل مصر عشان يتجوزها ويخلص الشقة ويعملوا الفرح كان واخد إجازة أربع شهور وكنا مفروض نخلص خلالهم كل حاجة وهي تسافر معاه لكن من أول ما نزل معاملته اتغيرت وطريقته بقت غريبة وبدأ يعمل مشاكل في البيت ويتخانق على حاجات ملهاش لازمة.
وبعدها عرفنا من حد ابن حلال إن الراجل ده طول فترة سفره اتعرف على واحدة هناك واتجوزها وهي حامل منه دلوقتي يعني هو نازل مصر مش عشان يكمل جوازته من بنتي زي ما إحنا فاكرين هو نازل عشان يفركش الجوازة ويخلص منها ويرجع للست اللي اتجوزها هناك.
والمشكلة إنه بدل ما يقول الحقيقة قعد يزهق في بنتي ويعمل مشاكل لحد ما الموضوع يوصل إننا نقول خلاص مش هينفعوا مع بعض وإحنا في الأول كنا مقدمين حسن النية ومش فاهمين هو بيعمل كده ليه لحد ما عرفنا الحقيقة وقتها قال خلاص كل واحد يروح لحاله وأنا عايز دهبي والهدايا والحاجات اللي أنا جبتها لها وقال لها ربنا يعوضك بواحد أحسن مني.
ساعتها أنا انفجرت وقلت له إنت مالكش ذهب عندنا ومالكش هدايا عندنا ومالكش حاجة عندنا بنتي عايز تطلقها طلقها بنتي مش وحشة ولا قليلة ولا ناقصها حاجة وهي حسب ونسب وأصل وهيجيلها الأحسن منك ومن ساعتها وهو رايح جاي بقاله شهر وأنا مصممة إني ما أرجعش له حاجة.
أبو بنتي متوفي وعمها هو اللي واقف معايا وبيقول لي إنتي لازم ترجعي له حاجته وأنا بقول له لأ أنا بنتي استنت الراجل ده خمس سنين من عمرها وهو كان رابطها بيه وهي مستنياه على أساس إنه جوزها وإنهم هيكملوا حياتهم مع بعض وفي الآخر نزل بعد خمس سنين وهو متجوز واحدة تانية وحامل منه وجاي يفركش جوازته من بنتي.
عمها بيقول لي إنتي كده بتاخدي حق مش حقك وبتطمعي وممكن توقفي حال بنتك والناس تقول علينا إيه قلت له أنا مش باخد حاجة لنفسي ده حق بنتي وأنا مش فارق معايا الدهب ولا الهدايا في حد ذاتهم أنا اللي فارق معايا إن الراجل ده يسيب بنتي بعد خمس سنين انتظار وكأنه مفيش حاجة حصلت ويرجع ياخد كل حاجة ويمشي أنا لازم اربيه.
أنا قلت له لو بنتي اتطلقت خلاص كل واحد يشوف حاله لكن مش معنى إنه هو اللي قرر يسيبها بعد ما ربطها خمس سنين إنه يطلع من الموضوع كأنه مفيش حاجة حصلت ده لازم بتأدي واللي هيأدبه الدهب والهدايا عشان بنات الناس مش لعبة.
ودلوقتي أنا محتارة أرجع له الدهب والهدايا وأقفل الموضوع عشان ما أكونش سبب في وقف حال بنتي ولا أتمسك بموقفي وأقول ده حق بنتي والراجل لازم يتحمل نتيجة اللي عمله ويتأدب
لم تتم الاجابة بعد
